 Enxienplo de quando la tierra bramava
Ansí fue que la tierra començó a bramar:
estava tan finchada, que quería quebrar;
a quantos la oyén podié malespantar;
como dueña en parto, començós de coitar.
La gente que bramidos atán grandes oía,
coidavan que era preñada, atanto se dolía,
pensavan que grand sierpe o grand bestia pariría,
que a todo el mundo conbrié e estragaría.
Quando ella bramava, pensavan de foír,
e desque vino el día que ovo de parir,
parió un mur topo: escarnio fue de reír;
sus bramuras e espantos en burla fueron salir.
E bien ansí acaesçió a muchos e a tu amo:
prometen mucho trigo e dan poca paja, tamo;
çiegan muchos con el viento, vanse perder con mal ramo;
vete, dil que me non quiera, que no'l quiero ni'l amo.
Omne que mucho fabla faze menos a vezes;
pone muy grant espanto, chica cosa es dos nuezes;
las cosas mucho caras alguna ora son rafezes,
las viles e las refezes son caras a las de vezes.
Tomé por chica cosa aborrençia e grand saña,
arredróse de mí, fizome el juegomaña;
aquel es engañado quien coida que engaña,
d'esto fize una troba de tristeza tan maña.
Fiz luego estas cantigas de verdadera salva,
mandé que gelas diesen de noche o al alva;
non las quiso tomar; dixe yo: ¡Muy mal va;
al tiempo se encoje mejor la yerva malva!
JOSÉ MANCILLA
| | |
|
|
Tema anterior
Primer 
