Zodiaco romanesco per Tebruccio (gli altri non leggano) - PHALLABEN

XODIACO VERONESE

RENGA
dal 21 Marso al 20 April
Pianta: Carota selvadega
Posto fortunà: Burundi
Color: Salmòn
Descrisiòn: Te sì na persona che gà bisogno de asiòn: te ghè sempre oja de moarte, de far e de brigar; te piase essar indipendente e te dà fastidio se i te comanda. Rabioso, te piase dominar in situasioni dificili e te ghè 'n saco de inisiative... ma còntanela tuta... te sì mia bon de portar a termine proprio tuti i mestieri che te scominsi! Te dovaresi terminar quei, pitosto che scominsiarghene altri doxento! Te vol far sempre tuto in pressia e de testa tua e te si anca 'n pochetìn egoista. A olte te manca anca chel s-ciàntin de tatto che in certe situasioni el servaria: ma no le miga colpa tua, l'è che no te te ne incorsi neanca. Te godi spesso de bona salude ma, anca se te ghè enerxia a buso, te pol patir par i tò ecessi. Bei manco goti.

TRICHECO
dal 21 April al 20 Majo
Pianta: Geranio
Posto fortunà: Polo Nord
Color: Sedano
Descrisiòn: Te sì realista, tenace, testardo e possesivo. 'N pochetìn spaca maroni a dirla tuta. Te sì anca lento e te tendi a essar pigro, ma te ghè anca pasiensa a buso e prima de far qualcossa te ghè pensi sempre do olte. Te podaressi anca pensar de manco che te faria ben. Te ghè 'n spiccà senso de l'economia e el dono de saver usar i schei con parsimonia. Se i te fa dei complimenti no te te lassi abbindolar facilmente, parchè te sì na persona semplice e conservatrice. Te piase impuntarte quando te pensi de averghe rexon, te ghè na bona memoria, par quela quando te perdi qualcossa te lo cati subito. Te ghè 'n gran magnetismo nei confronti del sesso oposto, attension a no starghe massa tacà ai maroni che te podaressi sgonfiargheli.

GNU STRIATO
dal 21 Majo al 21 Giunio
Pianta: Brusaocio
Posto fortunà: Sotoscala
Color: Blu azteco
Descrisiòn: Te piase metar el naso dapartuto, te piase saver tante robe ma a dirla tuta te sì 'n pochetìn superficiale e no te vè mai a fondo in quel che te sè. Ciàcolon, te parli assè, te ghè na bona dialetica che spesso la te salva e la te giuta a mascarar quel che no te sì mia bon de far. Te sì intuitivo e rapido nel rivarghe ma spesso te ghè furia de conosar tuto e in pressia. Fate i cavoli toi na qualche olta! Se te sì dona mejo par ti, se te si omo invesse... te sì come na dona parchè te riesi a far e organixar tante robe in de na bota sola. Te piase xugar con la setimana enigmistica ma anca star fora e xugar a balon. Te patissi massa de nervosismo: sta chieto na s-ciànta.

PITO
dal 22 Giunio al 22 Lujo
Pianta: Fior de Cuculo
Posto fortunà: Engazzà
Color: Maron
Descrisiòn: Te sì sensibile e na persona emotiva. te piase ndò te sì nato, ndò te vivi e te si tacà a le to raise e la to fameja. Te si 'n s-ciàntin capricioso, volubile come na sposeta e spesso te vien le malinconie, parchè te parli sempre del to passato e de la to fameja. Te gavarè anca na bona memoria ma te podaressi anca cambiar discorso na qualche olta! Te sì ambisioso ma mai sfacià: Brào, tentelo par tì. Sicome te sì 'n senio de acua, te ghè bisonio de moarte parchè te ghè massa retensiòn. Bei Rocchetta e petala lì con che le bire.

LEORO
dal 23 Lujo al 22 Agosto
Pianta: Carnivara
Posto fortunà: Kirghizistan
Color: Blu carta da sucaro
Descrisiòn: El tò ego l'è 'n pochetìn massa pronuncià, te piase star al xentro de l'atensiòn ma te ghè da pensar che no te esisti mia solo tì! Te si orgoglioso e te piasaria essar el mejo de la coà in ogni situasiòn... pecà che no la podarà mai essar come te vol tì. E sta atento quando i te fa i complimenti che te te godi massa. No sta credar a tuto quel che i te conta. Te piase comandar e organixar. Te tendi sempre a darghe a chialtri el laoro manco importante. Sicome el to segno el governa el cor, te podaressi essar fortunà in amor, ma anca patir de disturbi cardiaci quando te sarè vecio. Caro mio, no se pol miga averghe tuto.

VOLPìN
dal 23 Agosto al 22 Setenbre
Pianta: Rosa canina
Posto fortunà: Volpino de Zimella
Color: Verdo
Descrisiòn: Te sì na persona altruista, de cossiensa e te piase far el to laoro con precisiòn anca se questo l'è complicà e pien de rogne. Te sì cossita in grado de portar a termine tuti i mestieri che i te assegna parchè te piase che tuto el sia perfeto. Te podaressi moderar parò la to critica che l'è ecessiva e la fa vegner el late ai xenoci. I pol miga essar tuti perfesionisti come ti. Coretto verso l'altro sesso no te si 'n cacciator nato ma te pense e te valute assè prima de decidar sa far. Mòlate fora na nina, te faria ben. Dominà da Mercurio te sì anca nervoseto e te accusi problemi a la digestion. Mochela lì de nar a magnar al Mec-Donal.

BOGòN
dal 23 Setenbre al 23 Otobre
Pianta: Camomila
Posto fortunà: Valacchia
Color: Terra de Siena brusà
Descrisiòn: Te ghè svilupà 'n gran senso de l'estetica e te riserche sempre l'equilibrio in tante robe: l'arte de la diplomassia la t'è innata. Coi butei te sì simpatico, piacevole, te serche sempre de agir coretamente e de no averghe pregiudissi. No te piase mia star da par tì e te fè de tuto par scapar da 'n'eventual isolamento. Se te sì dona te sì bela, elegante e rafinata, se invesse te si omo te piase sercar 'n'amor stabile, sicuro. Te piase anca i schei e el sucesso, ma chiaramente no te pol mia essar tuto belo altro che tì e schifo chialtri, defatti se te ghè qualche disturbo, jè de natura psicosomatica e ai reni. Ciapa e porta a casa.

SIMESO
dal 24 Otobre al 21 Novembrie
Pianta: Ortiga
Posto fortunà: A&O
Color: Ceruleo
Descrisiòn: Te ghè 'n caratere ingropado assè. Te sì dominà da profondi impulsi emotivi, te sì pien de risorse e te ghè 'n grando magnetismo fisico. Te sì na persona passional e el tò senio l'è sicuramente el pì sensuale del xodiaco. El tò pianeta dominante l'è Marte. Te mancaria 'n pochetìn de tatto, defatti spesso capita che te ofendi qualcheduni e dopo te te sorprendi de averlo fato. Te si ala riserca del model de vida: 'n prinsipio par cui vivar o na strutura de vida da seguir. Par questa motivasiòn te sì intiero, no te acetti compromessi e te sì 'n gran individualista. Va ben che te lo fè par autodifesa ma serca de limitar l'acidità, te farà altro che ben. Tote 'n'alka-selser.

SOMARO
dal 22 Novembrie al 21 Dixembre
Pianta: Crisantemo
Posto fortunà: Repubblica Popolare Democratica del Laos
Color: Griso nebia
Descrisiòn: Esuberante, otimista, pien de vida e de fiducia e chel te dise le robe in faxa: queste je le carateristiche fondamentali de stò senio. Ghè piase far sport, viajar e averghe sopratuto na vida aventurosa, par questo motivo i nati de sto senio je destinè a maridarse piassè de na olta opure i vol restar da soli come 'n can par far tuto sensa averghe nisuni tra i piè. Dotè de na granda intuissiòn, je atirè e interessè a tute le materie filosofiche e de religiòn: robe che pol slargàr la conoscensa che ghè piase. Generalmente stasì ben ma i vostri ponti deboli je le anche e el fegado. De conseguensa gavì da ridur i alcolici e far poco l'ulaop che no ve fa mia ben par le anche.

COCKER SPANIEL INGLESE
dal 22 Dixembre al 19 Genàr
Pianta: Pratolina
Posto fortunà: Poian
Color: Senape
Descrisiòn: Te sì responsabile, afidabile e riservato: te preferissi tegnerte par tì i to problemi e al inissio no te fè na gran impression... te sì inavvicinabile. Te sì ambisioso e te ghè na gran pasiensa par questo par raggiunger de le mete prefissè te ghè el corajo de percorar camini longhi assè; te piasaria arrivar al vertice social ma te sè anca come laorarghe sù, conossendo le persone giuste che le te pol giutar in quel che te vol. In poche parole: te sì 'n taion. No te piase mia l'esibisionismo massa accentuà, te sì uno che laora tanto e te piase credar in qualcossa de superior... parchè na olta rivà al traguardo, se no ghè altri a ci domandarghe te necessiti de introspesiòn. A olte te pari massa sùcon ma l'è solo parchè te perserveri nei to obietivi. Te governa Saturno e sicome l'è anca el pianeta de i ossi, i nativi de sto senio i pol sofrir de dolori, reumatismi e artrosi. De solito el to fisico el se irobustisse col passar dei ani, no sta preocuparte quindi se te sì ancora xoino e mingherlin come 'n ciòdo. Ghè tempo par tuto.

ANARA
dal 20 Genàr al 18 Febrar
Pianta: Bruscanzolo
Posto fortunà: Giarela
Color: Vermiglione
Descrisiòn: Te sì na persona anticonvensional, original e te piase far le robe da par ti solo.Te capissi i problemi de chialtri pur mantegniendote distaccà. Brao, in un certo senso te sì bon de farte i afari toi. Dominà da Urano, te sì na persona che gà bisonio de libertà, de indipendensa e te riesi sempre a risolvar al mejo i raporti basè su l'amicissia. Piassè complicà se invesse parlemo de amor. Te senti el bisonio de averghe tanti amici, ma te sè anca che te sì bon de star da par tì quando te vol. Come tuti i senii de aria te sì alquanto inteletuale, ma piassè de chialtri te sì profondo: te credi nei cambiamenti e te piase lotar par afermar le tò reson o anca par el ben de la coletività. Rilasate che no te sì mia BatMan. Te sì inansi e no te dispiase mia le inovassioni, te le acetti volentieri. De solito sì onesti e fedeli e godì de bona salude. Semai qualche problemìn ghè l'avì ne la circolasion de le gambe.

PEGORA
dal 19 Febrar al 20 Marso
Pianta: Grassa
Posto fortunà: Stati Federati de Micronesia
Color: Fucsia
Descrisiòn: Te sì na persona molto sensibile ed emotiva. Forse 'n poco massa influensabile da i tò amici e da l'ambiente ndò te stè, sia in ben che in mal. Sicome te sì comprensivo e te credi che tuti i sia boni come ti, te si predisposto ala dedissiòn e al sacrificio verso el prosimo. Amor svejate, parchè al mondo de gente catia ghe n'è. No te sì mia competitivo, te piase le materie artistiche parchè te ghè 'n potensial creativo pitosto alto. Te sì anca intuitivo. Vulnerabile, te pechi de mecanismi de autodifesa e te sì anca emotivamente instabile. Par quela te patissi, oltre che de disturbi ai piè, de malesseri coleghè a l'emotività. Podaria darte el numero de 'n bon psicoanalista.